|
認真好彩，周一都仲有場好波睇，今晚安高愛隊曼聯主場鬥富咸，梗係撐「讓球主勝」，事關佢上星期作客輸畀保頓谷到成肚火，今次返奧脫福，仲唔係會大炒一場洩憤？「紅魔鬼」今鋪仲要有朗尼復出，對住傷兵滿營富咸，贏少球都唔制啦！（now632台周二凌晨4:00直播）
上仗輸畀保頓，加埋阿仙奴同車路士近兩星期聯賽都係連續贏波，換句話講，曼聯今晚有乜依郁，即係突然畀人放甩六分，「紅魔鬼」領隊費格遜唔係傻，今晚安高好相信佢一定會出最強陣容，去搶呢三分。
富咸作客唔掂學人鬥攻
好消息係，上周中歐聯復出C朗拿度入完個靚罰球，今仗信心大增，加埋當日休戰抖抖主力好似傑斯同雲達沙等，都會齊齊復任正選，加上森巴小將路爾斯安達臣愈踢愈好，後備上陣分分鐘成為一路奇兵！最重要，當然係弗爆朗尼復出，配合泰維斯，曼聯可以話係齊「架生」出戰，以佢近六次主場全勝無敵氣勢，要砌低富咸話咁易啦！
咪話安高係「紅魔鬼」擁躉就硬推曼聯，唔係嚇你，富咸今季聯賽作客六戰一場都未贏過！計狀態，呢班波近十一場先贏一場，點信得過？唔知係咪領隊拉禾山齊士近排傳出帥位不穩，所以壓力太大個腦亂龍，隊波仲有禾斯、基斯坦禾同伊恩皮雅斯等多名主力受傷，佢老哥居然都堅持話去到奧脫福要同曼聯鬥攻！講真，打死守都仲有權偷雞搶一分，你話要踢正常攻守，咁你瓣瓣輸晒，咪即係衰囉！
|