另一場西甲賽事，「主場毒藥」拉科魯尼亞讓奧沙辛拿平半，細鬼強捧奧沙辛拿。拉科本季「客強主弱」，齋計主場戰績聯賽包尾，本季六場主場聯賽僅贏一盤，其餘五場輸四個半盤，咁績一見到佢讓波，就知道應該點買啦！（有線足球台61周一凌晨零時直播）
三個月只四分 拉科魯尼亞近年已淪為二線球隊，本季主場出戰，更完全失去信心，聯賽打三個月，主場只係得四分，係廿隊西甲球隊中墊底。近期拉科都冇起色，近四主場聯賽一和三負，呢次又返到「地獄球場」出戰，心理壓力又返晒，對住硬淨奧沙辛拿，根本讓唔起。
奧沙辛拿聯賽已經連輸三場，不過三場都算係僅敗，整體演出唔算太曳。奧沙辛拿近四次作客對拉科，戰績可以見得人，當中取得兩勝，呢次趁對手勢弱，可以大打爭氣波成功搶分。