入波一向係前鋒工作，不過雲達不來梅同漢堡，今季都係靠中場搵食，皆因雙方陣中都有一位射手型中場助陣，分別係迪亞高同雲達華治，目前德甲射手榜頭十位，亦只有佢兩人唔係前鋒，今晚睇邊位先至係真正首席「中場射手」。
兩大中場都唔住 雲達華治今季已經射入八個聯賽入球，只係比東尼同高路斯少一球，事實上，呢位荷蘭國腳表面係中場球員，但球隊往往由佢負責埋門最後一腳，入波機會自然高，佢今季曾經試過連續五場賽事有波入，令唔少前鋒為之汗顏，雲達華治周中足協盃又有「士哥」，腳風之順，真係都唔住。
至於迪亞高方面，因為高路斯今季轉投拜仁，而要分擔更多入波責任，佢亦冇令球迷失望，已有七個聯賽入球進帳，近兩場聯賽合共入三球，由於陣中射手曉高艾美達因傷倦勤，不來梅今場入波重任就交晒畀呢位巴西國腳。