|
今個星期英超正值多事之秋，三位新領隊布魯士、麥利殊同祖維爾將於本輪英超登場，另外樸茨茅夫領隊夏利列納被捕案亦備受關注，咁多動盪對球隊演出肯定構成影響，大大增加投注不明朗因素，但樂比仔仍決定對「黑貓」新特蘭投以信心一票，主場可挫有新帥祖維爾上任打比郡。（now 635周六晚11時直播）
新特蘭上仗慘敗給愛華頓一比七，領隊堅尼賽後承認排陣失當，搵傷愈復出約基同疲態畢露艾度曉合作打中場，搞到成條中場線輸晒畀愛華頓，故今仗將會變陣出擊。樂比仔相當欣賞堅尼務實作風，佢勇於承擔同親民態度，得到球員擁護，所以新特蘭人腳雖然平庸，但主場往往藉一股氣勢同拚勁搶分成功。
唔三分點交代6億
「黑貓」上季英冠曾兩勝對手打比郡，信心明顯佔優，領隊堅尼已講明，當今場係護級生死戰咁踢，戰意唔使懷疑，如果今場未能全取三分，真係好難向花六億港元收購球員董事局交代，況且新特蘭今季主要係防守出現問題，進攻方面，今季入十四球，多過隻「綿羊」打比郡五個入球多多聲，憑主場之利贏波好合理。
打比郡換帥都救唔番
打比郡雖然搵祖維爾執，不過計人腳就算搵莫連奴都救唔番，打比郡七場作客一和六負，而且仲要一球波都入唔到，而摸和場都係靠打多一人優勢，呢場睇怕都難逃一敗！
|