|
今晚英超快車，由兩支黑馬球隊布力般流浪同阿士東維拉碰頭，維拉後備兵源薄弱，踢來踢去都係批主力，遇上「快車」場合作客好蝕底，布力般上場贏唔到谷住道氣，返主場係時候反彈，小讓平半上盤值捧。（now 632周四凌晨４時直播）
如果淨係睇往績，布力般三場未贏過，維拉則三連勝，睇維拉狀態較佳，之不過維拉所贏對手只係打比郡、伯明翰同米杜士堡，三隊都係聯賽榜最後五名球隊，贏波係合情合理。反觀布力般近三場對手有曼聯同利物浦，就算贏唔到亦踢得唔算失禮，所以樂比仔今場仍秤先有主場之利布力般。
事實上，維拉傳統以來作客成績都麻麻，過去三季都係取得四場勝仗，而今季已經贏兩場；以此推論，維拉餘下作客賽事贏波機會唔高，尤其今場對手係上游球隊布力般，預計維拉叻極都係打和，布力般讓平半，大可抱住半個盤博全個盤心態投注。
維拉主力踢到殘
維拉另一不利條件係板深度不足，共有六名球員踢足十三場聯賽，踢十場以上球員多達九人，如果唔係前鋒卡維早前受傷，相信維拉場場都係用同一個陣，領隊奧尼爾已多次抱怨，球隊一線主力不足，今次撞正快車賽期，注定冇運行。
反觀布力般近兩季都有參加足協盃經驗，周中波視如家常便飯，上仗沙維治、辛達告魯斯都冇出，明顯留有一手，加埋鄧尼坐完波監復出，抖足精神夠晒fresh。布力般上場和富咸二比二，領隊曉士話贏唔到好唔抵，呢次返主場，一於贏波補番數！
|