|
呢排天氣轉冷，提醒大家多件衫，以免好似磊宮咁終日與傷風搏鬥。講開場白，又係時候畀料大家。小弟今日睇中英超米杜士堡對阿士東維拉，米堡近六次主場對阿士東維拉全部開大，入球大值得再追！
米杜士堡同阿士東維拉一向畀人感覺，都唔係攻擊力勁球隊，但可能負負得正，呢兩班波走埋一齊，入波就唔停。米堡英超史上十二次主場對維拉，居然有九次開大，當中不乏一比三、二比五、三比二呢驚人戰果，入球大呢個走勢近六年更從未斷過。
維拉進攻瓣數多
事實上，米堡雖然已經八場聯賽不勝，好彩因國際賽得到兩個禮拜緩衝期，唔少傷兵經已好得七七八八，包括活基治、艾卡同美度，其中後兩者今季合共為米堡貢獻四個聯賽入球，齊齊復出鋒力銳增。
另一邊廂，維拉今季成功改善鋒力，進攻瓣數多多，令人防不勝防，艾邦拉賀射入五球已叫人意外，中堅拿臣亦有三球「士哥」，真係估你唔到，今晚作客出名豆腐防線米堡，一於玩「大」佢！
|