|
聽朝世界盃外圍賽南美洲區賽事，兩支三線弱旅交手，委內瑞拉主場迎戰玻利維亞，玻利維亞近年水準直插谷底，射手質素勁曳，球隊已經接近五百分鐘冇士哥，攻力弱得可憐，離開高原主場更難搶分，蘇豪睇好主Ｗ！（周三早上６時40分開賽）
五百分鐘入球荒
自從巨星艾茲華利收山後，玻利維亞足運每況愈下，依家仲未見到陣中有乜球員到飛，前線問題特別明顯。今次大軍名單當中，最具名氣位箭頭叫做謝美摩蘭奴，呢位老牌射手踢緊華盛頓聯隊，仲係美職聯史上最多士哥球員，不過，佢返到國家隊演出只係一般，仲未擔得起支大旗。
攻擊球員質素曳，導致玻利維亞鋒力極度疲弱，睇番球隊近況，自從美洲國家盃分組賽鬥秘魯後，球隊已經連續五場冇入波，入球荒接近五百分鐘，當中四場作客賽事加埋失十一球，今次離開高原主場，冇埋地利好難搶到分。
委內瑞拉今年以主辦國身份歷史性殺入美洲國家盃八強，足見球隊水準冒升，佢目前實力只屬南美第三梯隊，不過，陣中唔少球員已出國去歐洲搵食，包括馬略卡箭頭艾蘭高，級數明顯在對手之上，今次返主場對玻利維亞，當然有力再添三分！
|