|
今季靠班牛奶仔高踞荷甲榜首阿積士，今晚作客死對頭飛燕諾榜首大戰，安高認為經驗不足將會成為佢致命弱點，特別係阿積士家陣要靠二流練哥斯達領軍，臨場調動蝕底，飛燕諾讓平半，安高梗要上盤。（now826台及無收費電視26台周日晚7:30直播）
客軍牛奶仔擔綱
阿積士今季有戴維斯因傷長抖同史譚掛靴，球隊現時重飛係二十四歲亨特拉爾同二十八歲加比，其他新星包括蘇亞雷斯、施安迪莊、維頓漢同舒希達等，個個都得二十一、二歲，好處當然係活力十足，但壞處就係關鍵時刻缺乏比賽經驗。
今晚佢對手飛燕諾，今季大事招兵買馬，搵馬卡爾同雲邦賀斯兩老返穩定前後兩線，球隊開季以來一直表現對辦，家陣同阿積士同分，只係得失球唔及對手，但佢主場係五戰全勝入十二球未失一球，主場惡到爆，加埋豐富作戰經驗，點都數。
仲有要留意係，阿積士自從練卡迪過檔車路士，只係由青年軍提拔哥斯達上接手，呢個五十二歲頭過往最叻都係帶華域克同威廉二世呢二、三流球隊，冇大戰經驗「擇使」！
|