|
歐洲足協盃今明兩晚上演最後一輪分組賽，小組頭三名二十四支出線球隊，將與八支歐聯小組第三球隊明年二月中進行淘汰賽，有老友問肥叔有乜投注心得，肥叔可以畀兩個錦囊大家，就係清楚出線形勢同埋了解球隊作戰心態，今晚H組巴勒莫主場對切爾達（三）7，切爾達符合以上兩大要求，下盤可開出。（有線足球台61周四凌晨3時45分直播）
巴勒莫會長森柏連尼在第三圈對韋斯咸前曾經講過，希望足協盃提早出局，唔好打亂聯賽部署，因為進入「後電話門時期」意甲，巴勒莫大有機會爭一日之長短。講完呢番說話之後，巴勒莫會長森柏連尼自然受到多方面炮轟，受壓之下只好淘汰韋斯咸晉級，但巴勒莫進身分組賽後卻放軟手腳，多次收起主力派後備落場，反映巴勒莫志不在此。
或者有人會問，巴勒莫會唔會前三場分組賽留力，淨係搏呢場呢？肥叔認為呢點未必成立，因為巴勒莫要出線，要取決於另一場費倫巴治對法蘭克福戰果，巴勒莫形勢好被動，而且切爾達和波出線，戰意相當鮮明，何況巴勒莫氣勢已經冇季初咁強，切爾達受讓半球，下盤值博率相當高。
阿積士最後一擊掃「雷」
足協盃另一場心水係阿積士（三）９，對手華雷根呢支比利時下游球隊，能夠晉級三十二強可謂最大冷門，呢隊波可以出線，全靠打鬥志同拚勁，但既然佢已達成呢個目標，最後一場分組賽容易放軟手腳，老牌球會阿積士踢到最後一輪仍未出線，早已面目無光，今仗定必全力爭勝，挽救近期跌入低谷信心。
|