|
今晚有八場西甲賽事，初步睇形勢並唔明朗，不過華倫西亞傷兵名單仍然係水蛇春咁長，今晚仍可繼續反。至於嘉輝今日最有心水係奧沙辛拿，呢隊波沉寂一排後已全面復甦，攻力已經返晒，今晚於主場對住馬略卡，只係讓平半抵玩，上盤要捧！（周一凌晨零時開賽）
奧沙辛拿季初表現直插谷底，於九月尾到十月尾試過七場冇波入，明顯係畀歐洲賽後遺症影響，所以成班波謝謝。不過，近期表現大有改善，直落贏三場，埋單計攻入九球，進攻火力已經返晒，水準已回復到上季當弗時期八九成。睇番上季球隊主場惡氣縱橫，勝出率有六成幾，認真唔小，既然依家重新振作，主場出擊當然值得信賴。
奧沙辛拿今季貫徹以往攻擊模式，練施根達以米路斯域做膽，輪流搭住羅美奧同蘇爾達杜，加上華度後上埋門，呢個進攻鐵三角開始發揮作用。上場球隊作客反勝薩拉戈薩，成功踢起晒班球員信心，雖然周中要應付足協盃，但目前旺勢返緊，仲點會畀佢停！一於再追。
上季互撼馬略卡兩負
馬略卡方面，今季聯賽作客贏過三場，驟眼睇好似幾掂，睇真，贏只係升班馬塔拉戈納同利雲特，以及長期態沉貝迪斯，對手曳成咁又點可以作準呢？再者，上季兩隊兩次交手，奧沙辛拿都係小勝一比○，贏來點到即止，再加上近六次對賽未輸過，今場讓平半絕對係筍盤。
同晚仲有場升班馬大戰，塔拉戈納主場對住利雲特，兩軍都係咁高咁大，主隊今場唔搶分仲等幾時，而且近兩次主場對住利雲特贏晒，今場馬會開平手盤，塔拉戈納同樣捧得過！
|