「紫百合」費倫天拿本來係一支唔錯球隊，最慘季初負分起步，令到佢一早就要為護級盡搶分數。今晚費倫會作客基爾禾，佢仲未脫離護級區域，決心比起基爾禾大得多。以費倫實力，讓基爾禾平半實在唔多，上盤係細鬼重心推介之一。（周日晚10時開賽）
費倫今場其中一個利好因素係陣中傷兵唔多，柏蘭迪利今場就可以排出最佳陣容挑戰基爾禾。梅度同東尼固然係費倫正選，但唔好忘起仲有個後生仔柏仙尼。細鬼睇過佢上季未重傷時演出，係一個好有射門觸覺球員，而佢休養一段日子後已經回復生氣，早前對阿特蘭大仲梅開二度。佢今日如果有機會出場，基爾禾班守唔係咁易應付。
ＡＣ質高冇甩「拖」 基爾禾可以話神經刀，除非具備有力論據支持，唔係細鬼唔會咁輕易推介呢類表現唔穩定球隊。睇番近幾場波，基爾禾之所以有表現淨係踢一個域陀奧賓拿，若今場費倫派專人「嘜」實佢，想突圍都唔容易。
ＡＣ米蘭對拖連奴之戰，好多人唔睇好ＡＣ，但我認為呢類大球隊唔會咁快就氣餒，況且對手拖連奴畀我感覺係一支欠攻力球隊，ＡＣ憑班底及主場之利贏波唔難。
