意大利波一向入球唔多，故「細」盤賠率每每偏低，似乎冇乜肉食，但細鬼認為足球博彩最緊要中，唔中話畀一百倍你都冇用。只要唔嫌賠率低，就可以密食當三番。好似今晚卡利亞里主場對ＡＣ米蘭，後者今季攻力認真麻麻，六場作客聯賽全部開「細」，呢場一定要再追！（有線足球台61周日晚10時直播）
卡利亞里小島威力勁 ＡＣ今季屋漏兼逢夜雨，因涉「假波案」而被重扣八分，仲有神射手舒夫真高離隊，兼且遇上傷兵潮，成績低落可以理解，目前僅排聯賽榜十五位。雖然佢經驗豐富，但鮮有遇到如此低潮，一眾球星難免顯得心浮氣躁，根本發揮唔到應有水準，早前碰上聯賽三連敗後，近期總算有回勇象，意大利盃贏完布雷西亞後，聯賽亦小勝墨西拿，不過對手咁弱，ＡＣ贏波亦證明唔到已走出低谷，呢次作客要入波唔易。事實上，舒夫真高走後ＡＣ攻力疲弱，尤其作客更加屢射不入，六場作客聯賽僅入四粒。
卡利亞里位處撒丁島，小島威力唔係小，今季就贏過巴勒莫同和過國際米蘭，六場主場五次開「細」，呢次對住「冇牙老虎」ＡＣ，開「細」點會走雞？
