|
擂台推介連日失利，前晚終於靠燕豪芬同阿積士打破悶局，睇都係荷蘭波呢個老本行旺羅賓，今晚順勢玩番
荷甲波，三場賽事預計都係主隊天下，最有信心梗係近期旺到爆燈阿爾克馬爾，主場對唔識作客荷華高斯
，絕對係大炒格，「讓球主勝」讓到兩球都可以放心捧場。（周日凌晨3時開賽）
尋日都講過，阿爾克馬爾周中荷蘭盃十比一大炒業餘隊梅爾森，前晚佢支B隊亦以八比一淘汰另一支業餘隊
真尼梅頓，將練尹戈爾崇尚進攻足球發揮得淋漓盡致，絕對係上盤客信心保證。
贏波賀球會第900W
未計今輪賽事，阿爾克馬爾排第三，分別落後阿積士四分及燕豪芬兩分，趁榜首雙雄聽日對決隨時齊齊失分
，當然要趁機會追番上去。阿爾克馬爾近況大勇，上月中不敵燕豪芬後，連盃賽已經連贏五場，加埋入廿六
球，最搏命係射手高化文斯，呢位高大中鋒今季已經累積七個聯賽入球，吸引雲巴士頓注視，入選荷蘭國
家隊熱身賽大軍，更加要以表現爭取國家隊正選席位。
主隊練尹戈爾一向以進攻足球自負，主場出擊甚少會見好就收，所以經常大炒對手，今晚一於以漂亮勝仗，
慶祝球會歷史上第九百場正式賽事勝仗。
對手荷華高斯出晒名靠膠地主場搶分，作客冇段好睇，聯賽已經直落連輸五場，近四場仲要食蛋兼失足十球，
面對攻力超強阿爾克馬爾，最少捧三、四隻蛋返屋企。
|