今晚葡萄牙對法國，據肥叔所知，早飛去勢冇尋晚德國對意大利場波咁厲害，可能同兩隊賽前都冇乜動靜有關，一場波但凡有乜消息，無論係正面或負面都好，都會刺激投注者意欲，法國同葡萄牙新聞冇其他球隊咁 多姿多采，令早市交投亦唔算活躍。
受讓變讓人好牙煙
今屆世界盃可以話係實力最平均一屆，四強冇一隊實力特別突出，所以投注冠軍注碼亦好平均，不過如果要肥叔揀，真命天子一定唔會係法國，法國上兩場贏西班牙、巴西確實贏得清脆漂亮，但唔好忘記兩場波法國都係被睇淡一隊，而且盤口都係受讓，今番對葡萄牙法國竟然要讓波，情況完全唔同。
根據目前外國博彩公司盤口，法國要讓半球，馬會亦做緊法國讓平半低水，呢個盤口並唔能夠反映兩隊實力差距，只係法國贏完巴西唱熱所致，預計今場會有唔少跟風客捧上盤，但真正有識之士一定會要下盤，因為葡萄牙連贏荷蘭同英格蘭絕唔係僥倖，葡萄牙講名氣唔及法國，但無論戰術、球員狀態同信心，都法國之上，值得持有下盤。
|